...Aber, genediger herr, sich tregt zu, daz mir gleich in der
stund, alß mir euer gnaden brief ward, auch ain brief bey aignem boten von Jorgen Pfaller, dato auf dem schloß zu Leuttenberg,
zukam, innenhalten, wie die baurschaft in beder herren,
graf Guntther und graf Hans Hainrich, auch an mer andern
orten, entper und des wyllens warn, die saigerhutten zu Hoch-
kyrchen, Arnstatt und unser nuy erpaute hutten zu
plundern
und in grund zerreissen. Sy hetten auch allred zu Salffeldt
und an andern orten vyl unschicklichs zu handlen angefangen
und das schloß Weyssenburg an der Sal belagert, wie sollichs
euern gnaden durch Jorgen Pfaller nach lengs seins anzeigens auch
gen Leitzg an Hainrichen Scherel anzeigt ist. Darauß euer gnaden
abzunemen haben, wa sollichs virnemen der pauerschaft
iren virgang gewynen solt, wie unmuglich unß werre, den handel
zu erhalten, und wie es die not so großlich erfordern wurd, das
euer gnaden mit euern gnaden und fettern auch ein nachdencken hetten,
wie die handlung bey euern gnaden zu stellen, damit ein zeyt bis
auf wider besserung der leff stylgestanden wurd, alß wol im
bergwerck alß auf den hutten. Dan bey virgang des ungestemen
virnemens, daz sich nit mynder im wirtzburgyschen, aichstettischen,
mentzischen, wirttenbergischen, am Schwartzwaldt und niderm
Algee bis gegen Myndelhaym und mer andern orten, alß im
schwartzenburgischen erzaigt, wurden alle handel ernyderligen.
Wiewol ich nochmalen besserung durch die genade Gottes
verhoffen wyl, hab ich doch euern gnaden, alß der derselben,
auch derselben bruder und fettern, allen meyn genedigen herren
mit truywen genaygt ist, guter maynung anzeigen wollen,
unangesechen, das ich gnugklich wyssen trag, das euer gnaden in
sollichem und anderm der nottorft zuvirtrachten wyssen und
im selben alß ein getruywer her und vorsteher nit feyren.
Es sollen die wirttenbergyschen paurn auch Pretta, ein stettlin,
meinem gnedigen herren, pfaltzgraf Ludwigen, kurfursten,
zugehorig, belegert haben umb des wyllen, das ob denn
dreyssig wegen gutz, die auß der mess heraufgangen, dar-
innen send, die sy fur puntysche guter inen heraußzugeben
haben wollen. Dan der loblich punt noch mit einem
zimlichem guten her, das gegen den oberlendischen algeyschen
pauren gehandelt und jetz iren zug gegen Wirttenberg
genomen haben, also wider die paurschaft entpor und
warlich an vyl orten nun groß sorg, mue und arbayt ist.
Wie dem allem, vertroste ich mich hohlich ungezweyflet, die-
weyl sich euer gnaden, vylleicht auch mein genediger her graf
Botth zu Stolberg etc. sampt andern mer meiner herren, disen
beder hutten handelsvorwanten zu Leiptz in dissem
marckt erscheinen, one zweyfel dise schwere leff vir augen
nemen und, wie aufs geschicklichest sich dargegen zu halten,
betrachten werden. Bin ich auch altzeyt getruys gemietz gantz
wyllig neben der sachen, alßvyl an mir ist, das beste zu thun,
mich hiemit euern gnaden alß meinem gnedigen herren
altzeyt befelchend etc.
Datum Nurmberg, am hayligen Creutztag, den drytten tag im
Mayen des funfzehenhundertundfunfundzwaintzigisten
jars etc. __ __ __
Euer gnaden underteniger
Jacob Welser der Eltter.
